
第一世噶玛巴教言集1KM22དགྱེས་རྡོར་ལྷ་ལྔའི་ཚོགས་མཆོད་བཞུགས་སོ། །
1-2-171b
༄༅། །དགྱེས་རྡོར་ལྷ་ལྔའི་ཚོགས་མཆོད་བཞུགས་སོ། །
༄༅། །དགྱེས་རྡོར་ལྷ་ལྔའི་ཚོགས་མཆོད་བཞུགས་སོ། །ན་མོ་གུ་རུ། ཚོགས་ཀྱི་མཆོད་པ་བྱེད་པར་འདོད་པས། གནས་ཁང་ཡིད་དུ་འོང་བར་ཆག་ཆག་ལེགས་པར་བྱ། བླ་རེ་དང་འགྲིག་ཡོལ་ལ་སོགས་པ་ཡིད་འཇུག་པའི་རྒྱན་བྲེས། དེ་ནས་མཎྜལ་དྲི་བཟང་གིས་བྱུགས་རེ་ཁ་དཀར་པོ་ཟླུམ་པོར་བསྐོར་ལ། ནང་དུ་པདྨ་འདབ་མ་བཞི་པ་བྲིས། འདབ་མ་བཞི་དབུས་དང་ལྔར་མེ་ཏོག་ཚོམ་བུ་རེ་བཀོད། དེ་ནས་ཀ་པཱ་ལ་མཚན་ལྡན་གཅིག་གི་ནང་དུ་རྡོ་རྗེ་དང་དྲིལ་བུ་བྲི། བདུད་རྩི་ལྔས་བྲན་པའི་ཆང་བླུགས་ལ་དབུས་ཀྱི་ཚོམ་བུའི་སྟེང་དུ་བཞག །གཡས་གཡོན་གཉིས་སུ་བླ་མ་དང་དཀོན་མཆོག་གི་མཎྜལ་གཉིས་བྱ། དེ་ལ་ཅི་འབྱོར་པའི་མཆོད་པས་བསྐོར། ཡི་དམ་དང་ཆོས་སྐྱོང་གི་གཏོར་མ་ཇི་ལྟར་རིགས་པར་བཤམ། དེ་ནས་རང་ཉིད་སྟན་བདེ་བ་ལ་འདུག་ལ། དགྱེས་པ་རྡོ་རྗེ་སྒྲུབ་ཐབས་ལྟར་བསྐྱེད་ལ། བསྙེན་པ་ཅི་རིགས་པ་བྱའོ༑ ༑དེ་ནས་མཎྜལ་དབུས་མ་དེ་སྟོང་པའི་ངང་ལས་རིན་པོ་ཆེ་སྣ་བཞི་ལས་གྲུབ་པའི་རི་རབ་ཏུ་བསམ། དེའི་སྟེང་དུ་རིན་པོ་ཆེའི་གཞལ་ཡས་ཁང་གྲུ་བཞི་སྒོ་བཞི་ཀ་བ་བརྒྱད་རྟ་བབས་བཞིས་ཉེ་བར་མཛེས་པ་གཅིག་བསམ། དེའི་ནང་དུ་ཀ་མ་ལ་འདབ་མ་བཞི་པའི་ལྟེ་བ་ལ་ཉི་མའི་སྟེང་དུ་བཅོམ་ལྡན་འདས་དགྱེས་པ་རྡོ་རྗེ་ཡབ་ཡུམ་བསྐྱེད། ཕྱོགས་བཞིའི་འདབ་མ་བཞི་ལ། གཽ་རཱི། ཙཽ་རཱི། བཻ་ཏཱ་ལཱི། གྷསྨ་རཱི་བཞི་
1-2-172a
༄༅། །བསྐྱེད། དེ་ནས་རང་གི་ཐུགས་ཀ་ནས་འོད་ཟེར་འཕྲོས་པས། དགྱེས་པ་རྡོ་རྗེ་ལྷ་ལྔའི་དཀྱིལ་འཁོར་སྤྱན་དྲངས་ལ་བསྟིམ། དེ་ནས་ཞབས་བསིལ་སྔོན་དུ་འགྲོ་བའི་མཆོད་པ་ལྔས་མཆོད། བསྟོད་པ་བྱ། དེ་ནས་གྲོགས་ལྟ་སྤྱོད་འཐུན་པ་ཡིན་ན། ཚེ་ཐོག་མ་མེད་པའི་སྡིག་པ་རྣམས་དཀྱིལ་འཁོར་གྱི་ལྷ་ཚོགས་ཀྱི་སྤྱན་སྔར་བཤགས་སྙམ་དུ་བློས་བཅོས་ལ། རྡོ་རྗེ་གུར་ནས་གསུངས་པའི་སྐྱབས་འགྲོ་སེམས་བསྐྱེད་ལན་གསུམ་བྱ། དེ་ནས་གསོལ་བ་བཏབ་པར་བྱ་སྟེ། བཅོམ་ལྡན་འདས་དཔལ་དགྱེས་པ་རྡོ་རྗེའི་དཀྱིལ་འཁོར་གྱི་ལྷ་ཚོགས་འཁོར་དང་བཅས་པ་རྣམས་བདག་ལ་དགོངས་སུ་གསོལ། བདག་རྡོ་རྗེ་འཛིན་པ་མིང་འདི་ཞེས་བགྱི་བ་ཕྱག་རྒྱ་ཆེན་པོ་མཆོག་གི་དངོས་གྲུབ་ཚེ་འདི་ཉིད་ལ་ཐོབ་པར་མཛད་དུ་གསོལ། ཉམས་དང་རྟོགས་པ་བླ་ན་མེད་པ་རྒྱུད་ལ་སྐྱེ་བར་མཛད་དུ་གསོལ། བར་ཆད་ཐམས་ཅད་ཞི་བར་མཛད་དུ་གསོལ། བསམ་པ་ཐམས་ཅད་འགྲུབ་པར་མཛད་དུ་གསོལ། ཞེས་ལན་གསུམ་གསོལ་བ་བཏབ། དེ་ནས་མཆོད་པ་དབུལ། བསྟོད་པ་བྱ། ཆོ་ག་ལྷག་ཆད་བསྐང་བའི་ཕྱིར་ཡི་གེ་བརྒྱ་པ་འདོན། དེ་ནས་ཡེ་ཤེས་པ་གཤེགས་སུ་གསོལ། དམ་ཚིག་པ་བདུད་རྩིའི་རང་བཞིན་དུ་གྱུར་པར་བསམ། དེ་ནས་དང་པོ་སྤྱི་བོར་བླ་མ་མཆོད། དེ་ནས་རང་ལ་གཏོར་བས་ལུས་ཐམས་ཅད་མཁའ་འགྲོ་མས་བལྟམས་
1-2-172b
པར་བསམ། ཚོགས་ལ་གཏོར་བས་བདུད་རྩིར་གྱུར་པར་བསམ། རྣལ་འབྱོར་པ་རྣམས་ལ་གཏོར་བས་ཧེ་རུ་ཀ་ཡབ་ཡུམ་དུ་གྱུར་པར་བསམ། དེ་ནས་གཏོར་མ་བཏང་ཚོགས་ལ་རོལ། ལྷག་མའི་གཏོར་མ་བཏང་༑ རྣལ་འབྱོར་པ་རྣམས་དགྱེས་པར་བྱའོ། །དགྱེས་པ་རྡོ་རྗེའི་ཚོགས་ཀྱི་མཆོད་པ་རྫོགས་སོ།། །།འདིའི་རྒྱུད་པ་ནི། རྡོ་རྗེ་འཆང་། ཕྱག་ན་རྡོ་རྗེ། བློ་གྲོས་རིན་ཆེན། ས་ར་ཧ་པ། དྲིལ་བུ་པ། ཡན་ལག་མེད་པའི་རྡོ་རྗེ། དགའ་བའི་རྡོ་རྗེ། རྡོ་རྗེ་གདན་པ། ཨ་བྷ་ཡ་ཀ་ར། བཻ་རོ་ཙ་ན། དུས་གསུམ་མཁྱེན་པ། པྲཛྙཱ་ཀཱིརྟི། རིན་ཆེན་འབུམ། འཐབ་བླ་མ་ཁམས་པ། བླ་མ་འཇམ་དཔལ། ཤར་དགོན་པ། མཁན་པོ་ཀུན་དགའ་འོད་ཟེར། བསོད་ནམས་དཔལ། དེས་བདག་ལའོ།། །།


目录
དགྱེས་རྡོར་ལྷ་ལྔའི་ཚོགས་མཆོད་བཞུགས་སོ། །